Apr 022013
Apr 022013
لبناني الهوية
ضايع بهالخبرية
يا مسيحي يا اسلام
يا بنادي بالعلمانية
الحرب بالسبعينات سموها اهلية
بعدو المشكل لهلق اهلية بمحلية
شيعة كتائب وقوات وتدخلو العونية
الحق منو عالبوسطة
الحق عالفلسطينية
صرنا بالقرن الواحد وعشرين
وما فهمنا شو الخبرية
Apr 022013
مشتاق كزدر عالمنارة….
واشتري بريوش وفول وحامض وترمس وكعك…
مشتاق لبيروت الطبيعية…
قبل ما تصير سوليدير، و دي تي و ضريح…
ومخصصة لطبقة واحدة من الناس…
ما بدي اسهر بالروف توب ولا بدي نرجل بزيتونا باي…
بكفيني كرسي بلاستيك… انا والاصحاب، نتامل روعة صخرة الروشة…
كمان بيروت عملولا عمليات تجميل…
صارت حلوة بس بلا معنى ،بلا منطق، بلا وعي، بلا ثقافة… صارت بلا طعمة.
ينطبق عليها القول “كوني جميلة واصمتي”
صارت منفخة… ورجعت مفخخة..
بدل ما نفيق عصوت فيروز صرنا نفيق عصوت انفجار… كانت فيروز مضيعا شادي… صار ما في الا شادي مبين والباقي كلو ضاع.
الله يرحم هيديك الايام!
بيروت اصبحت كالعاشقة التي زنت… اشتاق لها.. احبها… لكنها لا تشرفني!
ابراهيم هاشم
Apr 022013
بتذكر يا صاحبي شو كنت تقلي؟
تعى ننسي الطايفة
ننسى المذهب
وننسي الملة
بتذكر شو قسمنا هاللقمة سوية
انا الدرزي بيي السني وامي الشيعية
يا ما حكينا قصص الحرب بهالسهرية
ما فهمنا شو المشكل وشو القضية
ما قتنعنا كيف خي بيقتل خيو عالهوية
